Tuesday, June 18, 2013

.പുലഭ്യം ..


..പുലഭ്യം ..

ഇരുട്ടിലിരുന്നാണ് ഞാനെന്‍റെ
രാത്രിയും പകലും
വരച്ചുതീര്‍ത്തത്.
രാത്രിയെ നെടുകെ ഛേദിച്ചും
പകലിനെ തുപ്പലം കൂട്ടി മായ്ച്ചും
നിന്‍റെ ഓര്‍മ്മകളെ
കല്ലിലടിച്ചുകൊന്നും
ഞാനെന്‍റെ സ്വബോധത്തെ തൂക്കിലേറ്റി...
ഇനിയെനിക്ക് ,
നിങ്ങളെയെല്ലാം പുലഭ്യം പറയാം,
എന്നെ കല്ലെറിയൂ,
ഞാന്‍ ചിരിച്ചോളാം,
എനിക്ക് ഭക്ഷണം തരൂ
ഞാന്‍ തട്ടികളഞ്ഞൊളാം
ഒരു ചങ്ങല തന്നുനോകൂ
കാലിലിട്ട് ഇരുട്ടിനെ മെരുക്കുന്നതുകാണാം .
അതിനു മുന്‍പ്
ഒരു പുലഭ്യം കൂടി പറഞ്ഞോട്ടെ?
“എടീ കുരുത്തംകെട്ടവളേ,
ഇരുട്ട് നിറച്ച പാല്‍കുപ്പി
എന്‍റെ വായില്‍ തിരുകി
തിടുക്കത്തിലോടിമറയാന്‍
ആറടിമണ്ണിലെന്താ
വായുഗുളിക ഇരിപ്പുണ്ടോ???.”

ഷെബി ഒരു മഴതുള്ളി





Tuesday, May 21, 2013

ചുവപ്പു മഷി


ഞാന്‍
തല തെറിച്ചൊരു വാക്ക്
എന്നെ എഴുതിതീര്‍ക്കാന്‍
എനിക്കൊരു
കടലാസ് വേണം

വക്കുപൊട്ടിയ മഷികുപ്പി നിറയെ
എന്‍റെ കട്ടകുത്തിയ ചോരയില്‍
നിന്‍റെ കണ്ണുനീര്‍ ചാലിച്ചുനേര്‍പ്പിച്ച
ചുവപ്പുമഷി വേണം.

പരുക്കനായ
എന്നെ എഴുതി തുടങ്ങാന്‍
മുനയൊടിയാത്തൊരു
മഷിപേന വേണം

എത്ര എഴുതിയിട്ടും
തീരാത്ത സമസ്യപോലെ
ഓരോ വരികളിലും
നിന്‍റെ ഓര്‍മ്മകള്‍ നിറഞ്ഞു
നില്‍ക്കുന്നതെന്താണുപെണ്ണേ ?

ഏയ് കൂട്ടുകാരാ
ആ റബറിങ്ങ് തായോ
അടിമുതല്‍ മുടിവരെ
ഞാനെന്നെ മായ്ചു കളയട്ടെ ..!!

ഷെബി ഒരു മഴതുള്ളി


Tuesday, April 9, 2013

കടലാസുപട്ടങ്ങള്‍

















കടലാസുപട്ടങ്ങള്‍

ഞാന്‍ കണ്ണടച്ചപ്പോള്‍ ,

ഒരു കൈയ്യില്‍ ചരടും
മറുകൈയ്യില്‍ പട്ടവുമായി
കുട്ടി മുറ്റത്ത് നില്ക്കുന്നു.
തുറന്ന ആകാശത്തെ
മോഹിച്ച പട്ടം
കുട്ടിയോടുപറയുന്നു
“എനിക്ക് പറക്കണം”
“ഈ ചരടിന്‍റെ അറ്റത്ത് നീയെന്നില്‍
സുരക്ഷിതയാണ് നീ പറന്നുവരൂ.”
കുട്ടി പറയുന്നു!

പട്ടം പറന്നുയരുന്നു,പിന്നെ,
സ്വാതന്ത്ര്യത്തിന്‍റെ
മരുപച്ചകള്‍ക്കിടയിലൂടെ
കുട്ടിയുടെ കയ്യില്‍ നിന്നും
പട്ടം കുതറിയോടുന്നു
കുട്ടിയോ,
മുറ്റത്ത് മുഖം പൊത്തികരയുന്നു..

ഞാന്‍ കണ്ണു തുറന്നപ്പോള്‍ ,

ആകാശം നിറയെ
പക്ഷികള്‍ കൊത്തി കീറിപറിയുന്ന
കടലാസുപട്ടങ്ങള്‍ ..!!
മുറ്റത്തുനിറയെ,
മുഖം പൊത്തി കരയുന്ന കുട്ടികള്‍ ..!!

ഷെബി ഒരു മഴതുള്ളി.


Friday, August 3, 2012

ഒഴിഞ്ഞ സിംഹാസനം ..!



എന്‍റെ ലോകത്തെ
രാജാവും ഞാന്‍ തന്നെ
സിംഹാസനവും എന്‍റെ തന്നെ
പക്ഷേ,
നിന്‍റെ സിംഹാസനം ഞാന്‍
മോഹിക്കുന്നില്ല
അധികാരത്താല്‍ മലിനമായ
എന്‍റെ ലോകത്തേക്ക്
നിന്നെ വിളിക്കുന്നുമില്ല.

തെണ്ടിയും ഞാന്‍ തന്നെ
വയറൊട്ടിയ വിശപ്പും
എന്‍റെ തന്നെ
പക്ഷേ
നിന്‍റെ ഒരു തെരുവിലും
ഞാന്‍ യാചിക്കാനിറങ്ങുന്നില്ല
നിന്‍റെ പണപ്പെട്ടിയിലെ
ദയക്കായി കൈകള്‍ നീട്ടുന്നുമില്ല.

കൈയ്യെത്താ ഉയരത്ത്
മരണം പഴുത്ത് പാകമായി
തൂങ്ങികിടക്കുമ്പോള്‍
ഈ വിശപ്പ് താങ്ങാനെനിക്ക് വയ്യ.
പഴുത്തമരണം
മരണം കടിച്ചുതിന്ന ഞാന്‍
തെറിച്ചുവീണതോ
ചരമകോളത്തിലും...!!

ഷെബി ഒരു മഴതുള്ളി..




Monday, July 30, 2012

ചുളിഞ്ഞകടലാസ് ...!


ആരൊക്കെയോ എഴുതിമടുത്ത്
ചുരുട്ടിയെറിഞ്ഞ
ഇന്നലേകളുടെ ചുളിവുവീണ
കടലാസാണു ഞാന്‍...

കുത്തും കോമയും
ആശ്ചരിയ ചിഹ്നവുമിട്ട്
നീയെന്നില്‍
ഇതിഹാസം രചിക്കുമ്പോളും
ഞാനറിഞ്ഞിരുന്നില്ല
ഒരിക്കല്‍ നീയെന്നില്‍
ഓര്‍മ്മകള്‍ കൊണ്ടൊരു
ഫുള്‍സ്റ്റോപ്പിടുമെന്ന്

ഇന്നലെ
നിന്‍റെ അടുപ്പിലെ
എരിയുന്ന കനലുകള്‍ക്ക്
ഞാനഗ്നിയായപ്പോള്‍
എന്നില്‍
നീയെഴുതിയ വാക്കുകള്‍ക്ക്
കൂട്ട മരണം...!!


ഷെബി ഒരു മഴതുള്ളി

Friday, July 27, 2012

പകതുടരുമ്പോള്‍ ...




 നിന്‍ മഴുവേറ്റു മുറിഞ്ഞ
ശിഖരത്തില്‍
പച്ചിലകളുടെ നിലവിളി...

തായ് വേരറുത്ത
ചത്തമരത്തില്‍
അവിരാമം കൊത്തുന്നൊരു
മരം കൊത്തി..

മഴമേഘങ്ങളില്‍
നീ കഴുത്തറുത്ത് കൊന്ന
മഴകുഞ്ഞുങ്ങള്‍ ..

നിന്‍റെ വാളാല്‍
ഹ്രുദയം മുറിഞ്ഞ്
അവസാന പ്രകാശവും
ചുമച്ച് തുപ്പുന്നൊരു സൂരിയന്‍ ...

നിന്‍റെ ചെയ്തിയില്‍
പ്രക്രുതിയുടെ പക തുടരുമ്പോള്‍
മഴകാത്ത നിന്‍റെ മക്കള്‍ക്ക്
ഇടിവെട്ടേറ്റ് മരണം..

കരയെ തിന്ന കടലില്‍
പൊങ്ങികിടക്കുന്നത്
നാഥനില്ലാത്ത
ശവങ്ങള്‍ ..

വെയിലേറ്റ് തിളങ്ങുന്നത്
മണ്ണില്‍ പാതി പൂഴ് ന്ന
നിന്‍റെ തലയോട്ടി..

പകയുടെ വേട്ട തുടരുന്നു...!!

ഷെബി ഒരു മഴതുള്ളി..






Saturday, December 24, 2011

ക്രിസ്തുമസ് ആശംസകള്‍...

















ഞാനൊരു മുസല്‍മാന്‍
പക്ഷേ,
ഉമ്മറകോലായില്‍
സന്ധ്യാദീപം തെളിയുന്ന
ആ വീട്ടില്‍ എനിക്കൊരു അമ്മയുണ്ട്
അവര്‍ക്ക് ഞാനാരുമല്ലെങ്കിലും...

ഞാനൊരു മുസല്‍മാന്‍
പക്ഷേ,
അഞ്ചുനേരം നമസ്കരിച്ച്
മഗ് രിബിന് ഖുറാന്‍ ഓതുന്ന
ആ വീട്ടില്‍ എനിക്കൊരു ഉമ്മയുണ്ട്
അവര്‍ക്ക് ഞാനാരുമല്ലെങ്കിലും...

ഞാനൊരു മുസല്‍മാന്‍
പക്ഷേ,
ദിനവും കുരിശ്ശുവരച്ച്
മുട്ടുകുത്തി പ്രാര്‍ഥിക്കുന്ന
ആ വീട്ടില്‍ എനിക്കൊരു അമ്മച്ചിയുണ്ട്
അവര്‍ക്ക് ഞാനാരുമല്ലെങ്കിലും...

കാരണം
അവരിലെല്ലാം
ഞാനെന്‍റെ ഉമ്മച്ചിയെ കാണുന്നു...!!

എല്ലാ സുഹ്രുത്തുക്കള്‍ക്കും കുടുംബത്തിനും ക്രിസ്തുമസ്സ് ആശംസകള്‍..!

ഷെബി ഒരു മഴതുള്ളി...!